វត្ថុសិល្បៈខ្មែរពិចិត្រៗចំនួន ១៣៦វត្ថុសិល្បៈ មានអាយុកាល ចាប់ពីសម័យបុរេប្រវត្តិសាស្រ្ត រហូតដល់សម័យក្រោយអង្គរ ត្រូវបានជ្រើសរើសដោយសម្រិតសម្រាំងពីសមុច្ច័យសារមន្ទីរជាតិកម្ពុជា ដើម្បីដាក់តាំងបង្ហាញនៅសារមន្ទីរ Shanxi ប្រទេសចិន។ ការដាក់តាំងបង្ហាញនេះ ធ្វើឡើងចាប់ពីខែមិថុនា ដល់ខែតុលា ឆ្នាំ២០២៦។
ឯកឧត្តម លី វណ្ណា អនុរដ្ឋលេខាធិការក្រសួងវប្បធម៌ និងវិចិត្រសិល្បៈ កាលពីថ្ងៃទី០៥ ខែមិថុនា ឆ្នាំ២០២៦ បានដឹកនាំក្រុមការងារជំនាញ ដើម្បីពិនិត្យការរៀបចំដាក់តាំង និងសម្ពោធពិព័រណ៍វត្ថុសិល្បៈបុរាណខ្មែរ ក្រោមប្រធានបទ៖ “ អង្គរ និងសិល្បៈខ្មែរបុរាណ “ (Angkor and the Art of Ancient Khmer) នៅសារមន្ទីរ Shanxi ក្នុងខេត្ត Shanxi។
ក្រសួងវប្បធម៌ និងវិចិត្រសិល្បៈ បានចាត់ទុក សកម្មភាពនៃការតាំងពិព័រណ៍នេះ គឺជាផ្សព្វផ្សាយនិងរំលេចនូវភាពរស់រវើកនៃសិល្បៈបុរាណខ្មែរ កាលពីជាងមួយពាន់ឆ្នាំមុន និងជាសក្ខីភាពនៃសមិទ្ធិផលដែលកើតចេញពីកិច្ចសហប្រតិបត្តិការយ៉ាងស្អិតរមួតរវាងប្រទេសទាំងពីរ កម្ពុជា-ចិន ក្នុងការលើកកម្ពស់ និងផ្សព្វផ្សាយវប្បធម៌ និងអារ្យធម៌ខ្មែរ ដល់ប្រជាពលរដ្ឋចិន ដែលមានទំនាក់ទំនងជាប្រវត្តិសាស្ត្រជាមួយប្រជាជនខ្មែរតាំងពីសម័យបុរាណតរៀងមក៕
